Franco perderá o título de Alcalde Honorario e Fillo Predilecto da vila

O grupo de goberno do Concello estudará nesta semana a retirada do monolito aos caídos e a anulación oficial do título de Fillo Predilecto e Alcalde da Vila concedido na década de 40 a Franco. Ambas serán aprobadas, entre outras medidas de recuperación da memoria histórica.

O acordo polo cal se nomeou a Franco Alcalde Honorario e Fillo Predilecto podería ser revocado despois de que o Concello inicie nas próximas datas un expediente con esa finalidade.

A concesión dese título tamén levou aparellada a entrega da medalla de ouro da Vila de O Grove, que aínda ostenta oficialmente.

Ademais, O Grove conserva abondosa simboloxía fascista, que tamén podería ser retirada, como a cruz co nome de José Antonio Primo de Rivera na fachada da Igrexa de San Martiño, ou o xugo e as frechas (un símbolo dos Reis Católicos que foi asumido polo falanxismo) en diversas obras públicas coma os lavadoiros.

En relación ao monolito falanxista da Fonte do Galo, hai que sinalar que varios acordos plenarios, xa na etapa postfranquista, tomaron xa a decisión de retirar o monolito, polo que só se trataría de proceder definitivamente á execución dunha decisión xa tomada. Ademais destes acordos, existiron varias iniciativas cidadás para esixir a súa retirada, e sofreu varios ataques que afearon máis o seu aspecto externo.

A súa retirada podería demorarse aínda un tempo despois de que o grupo de goberno a acorde, para efectuar os trámites necesarios e encargar as obras.

O Concello podería iniciar esta semana os trámites para a retirada do monumento, unha iniciativa que provén do concelleiro de Cultura, Antón Mascato, que é tamén membro da Asociación pola Memoria Histórica de O Grove.

Mascato sinala que mantén "o máximo respeto para as familias dos mortos que constan nese monumento", xa que a maioría dos nomes non son asimilables ao símbolo fascistas, e mesmo varios deles simpatizaban coas ideas republicanas ou frentepopulistas e tiveron que morrer en primeira liña de guerra no frente de Huesca ou de Teruel, alistados á forza para salvar a vida.

O goberno do Grove tamén estudará como homenaxear e recuperar a memoria dos represaliados grovenses que foron perseguidos, encarcerados e xulgados pola defensa da República, como Ramón Garrido, Ángel Cadavid, Jacobo Otero ou Xacobe Barral.

(-noticia sacada de "Diario de Arousa"-)

Penso que isto dará moito que falar... aínda que personalmente, penso que isto é "de traca". Non entendo como carallo se poden conservar... "monumentos?" deste tipo, son un insulto á liberdade e democracia que supostamente impera actualmente na nosa vila. Debería terse tirado hai moitos anos. Agora haberá que ouvir, coma sempre, os queixigos e lamentos de catro vellos franquistas e catro personajes do Partido Populoso (recoñecidos ultradereitistas que até hai pouco tempo, con Flanders no sillón, roubaban cartos e falseaban datos do noso concello).

sen máis, me despido;

Trasno